9月20日，间中有几阵雨，短暂时间有阳光，天气仍然炎热。美股隔晚先低后高，低开后最终三大指数倒升收，主要系市场普遍预期今次议息只会加息0.75%，加息1%嘅机会有两成左右。不过焦点仍然系会后嘅议息声明，会唔会有11月加息提示，若然9月份只加息0.75%，11月会否再加0.75%?? 虽然暂时未有议息结果，但10年债息已升至3.5%。

美股上周消化咗唔少坏消息，淡友当然把握平仓机会，尤其当FDX发盈警，大幅睇淡下半年业绩，即引发市场悲观情绪，因为担心美国经济将走下坡。不过嚟呢个星期，情况又唔同咗，TSLA完成上海工厂产能升级，有助提升全年交付量，股价弹返接近2%。iphone 14Pro热卖，AAPL急急Iiphone 14嘅生产线改为生产14Pro，以满足需求，股价亦反弹2.5%。不过拜登讲咗句疫情大流行已过去，因为11月中期大选，佢当然系要讲吓呢啲嘢拉票，既然疫情已过，医药股插水，MRNA股价跌至5月低位，隔晚股价再跌7%。至于中概股噚日跟大势反弹，今日相关股份应该会喺港股做返好啲。

美汇指数升抵110前见阻力，强美元令新兴市场货币倒水，但又同时面对高通胀，只有局住加息，南美国家就面对呢个问题，而亚洲国家亦避面唔到资金流走，人民币见七算后，毫无招架之力。阿爷项多系限乮美元汇出，但人仔穿咗七算，人民币压力更大，好彩嘅系内地仍录得贸易盈余，今年头8固月嘅外资投资继续录得增长，不过美国持续缩表下，中国往后日子都难捱。

港股跌穿19000关后，噚日再下试18500水平，距离3月低位只有一步之遥，虽然沽压唔算严重，亦开始见淡友平仓，可惜仍然系无人肯入场捞货，以腾讯(00700)例，日日用几亿回购，但股价已回落下试上月低位，市场无人跟进。港股已进入阴干阶段，即使个别股份已回落至合理，甚至吸引水平，都只能小注慢慢收集，会唔会穿3月底部，又或者何时真正见底，暂时睇唔到，只能步步为营，甚至离场观望。

 以上内容归星岛新闻集团所有，未经许可不得擅自转载引用。