73岁的黄淑仪（Gigi），由19岁拍第一套剧集《梦断情天》出道，入行超过半世纪，虽然Gigi 姐近年主持烹饪节目较多，但对于演艺工作仍有追求，为挑战自己去年9月参演音乐剧《伴我同行》，演出大获好评。Gigi姐早前更首度公开有读写障碍，多年来读剧本为演出做准备，比一般人要花更多功夫，她一直以为是自己蠢兼记性差，但她依然很享受这份工作，不断增值自己。Gigi姐又分享近年荣升嫲嫲，弄孙为乐相当开心。

▲ 73岁的Gigi姐现在对选择工作的要求，角色有发挥最重要。

Gigi姐为演出音乐剧《伴我同行》，去年8月专程由温哥华返港演出，她解释相隔21年再答允艺术总监兼监制高志森邀请演出舞台剧，全因想挑战自己，“到咗呢个年纪都想挑战舞台剧，因为冇得NG，拍电视剧有得NG，咁我做唔做到呢？同埋知道个对手系焦媛，我就即刻应承，我睇过好多焦媛嘅舞台剧，最深刻印象有次不记得咩剧名，知道系焦媛做就入去睇，睇极点解仲未到焦媛出场嘅，原来佢少女咁戴咗个bob头，喺度又唱又跳，佢舞台上嘅身体语言系一流，完全认唔到佢，合作之后发觉大家嘅交流擦出火花好多，佢帮咗我好多。”正因合作太愉快，而音乐剧排练需时，只演出4场Gigi姐大呻唔够喉，“感觉好似排咗咁耐，大家嘅付出咁多做得四场，而且反应咁好，我自己都估唔到。”

▲去年9月，Gigi姐跟焦媛合演音乐剧《伴我同行》，剧中演工人“和姐”。

畀拍档何守信取笑太勤力

演出多年，经常要熟读剧本的Gigi姐，早前首度公开患有读写障碍，“人哋讲咗我都唔得，我一定要写低先记得，有时影咗张相我都要做手脚，呢个系边个，见返面我先会知，如果唔系个样认得，但不记得个名。”她一直没察觉记对白要靠写低剧本，直至年前经丈夫发现她这情况都属于读写障碍，“其实都好耐，不过我一路谂住系咁样做功课冇事，以为自己蠢或者记性差，我先生见到我成日都要写过晒啲对白喎，佢就提我呢啲都属于读写障碍。”

除了背对白困难，做主持要记硬数据更加考起Gigi姐，当时还被《欢乐今宵》的拍档何守信取笑，“何守信话‘你使唔使做咁多功课，你使唔使乜都写住佢，使唔使咁勤力呀’，其实我唔知道自己有缺憾，唔勤力唔得。”就连她自己写的食谱，也因为读写障碍问题，每次拍节目煮之前都要温习。不过竟然“飞纸仔”（即场才收到剧本）时，Gigi姐反而应付自如，“我睇完剧本写一写，写完后即刻拍，我记得拍《肥田囍事》同许志安胡杏儿有场戏，系我喺度教训佢哋，全场戏系我讲，‘飞纸仔’嚟到，我哋一齐化紧妆，我就喺度写写写，对一次跟住就拍，安仔话‘你真系犀利，畀着我今晚都收唔到工’，不过呢啲记得快掉得快，出咗厂头先嘅对白就冇晒。”

坐车睇人闹交储演戏素材

不过演戏经验丰富的Gigi姐，依然觉得自己有所不足，“虽然我有读丽的电视训练班第2期，但训练咗3个月已经调咗去配音组，之后就报告新闻，所以我喺戏剧班学到啲理论系肤浅到不得了。”既然理论基础不够，Gigi姐唯有靠日常生活来吸引演戏素材，“我钟意坐地铁同埋巴士，我喺车度会睇人哋啲表情反应，尤其系闹交我仲会睇，闹人嗰个点，被闹嗰个点，喺现实生活入面搵多啲呢啲嚟模仿，唔可以话我系明星，地铁巴士都未坐过，咁你点去演戏呀？！正所谓太过离地，唔系所有角色吓吓都做千金小姐，如果生活永远系不食人间烟火，你成世做神仙咩！？”

Gigi姐认为要有生活体验先至做得到戏，“我成日都话你唱歌跳舞，一日唔练就冇，但系演戏你唔使周围去练习演戏，人生嘅经历愈丰富演戏会愈好。老实讲睇其他人演出，佢都系演出嚟，但系我喺生活里面留意身边啲人，就容易吸收得到，你做出嚟定系发自内心会睇得出，多少少就会嫌造作。”欣赏踏实演技派的她，近年除了焦媛外，就喜欢睇潘灿良演出，“好多时舞台剧演员，一去到电视就会浮夸咗，但佢冇。”

▲徐肇平跟随Gigi姐步伐入行，亦有推出烹饪书，但Gigi姐不望他继承衣钵，只望他搵到满足感。

开心同孙仔每日视像倾偈

虽然Gigi姐依然有戏瘾，但除了现在难遇到有发挥角色外，还因为近年她可以弄孙为乐，“听见好多人话退咗休，除非有好剧本就出嚟做，我都系有呢个保留同心态，𠵱家做唔做对于我嚟讲都系凑孙会开心啲。”先后有两段婚姻的Gigi姐，共育有1女3子，长子和次子先后诞下孙女和孙仔，虽然孙女不在身边，孙仔一星期只见1次，已令她非常开心，“孙女5个月大，喺三藩巿嗰边，我会特登飞咗去三藩巿探吓佢，孙仔就嚟满两岁，识行识走又识表达少少意思。”就算她返了香港，一样每日同孙仔视像见面，“新抱放工返嚟开始煮嘢食，我个仔等佢唔好阻住妈咪做嘢，就叫佢打电话畀嫲嫲，佢一见到我就叫嫲嫲，但系叫得两声佢自己走佢玩，但喺视像度可以望住佢，同佢倾吓偈，有时佢耐唔中会抬头望吓你，佢叫得最准就系叫嫲嫲，叫爷爷变吔吔，爹哋就类似打打，总之叫得嫲嫲最准，哈哈！”

以上内容归星岛新闻集团所有，未经许可不得擅自转载引用。