去年11月，44岁的TVB“亲生仔”黄嘉乐，突然于社交网宣布与TVB结束21年宾主关系，原来连“铁马家族”老友马国明、林子善、唐诗咏及郑嘉颖都唔知，时至今日他才“耍冧”解释原因：“系有心隐瞒‘铁马家族’，唔想解释咁多，更加唔想决定被动摇，畀我接受人生最重要嘅挑战啦，否则我会后悔㗎！” 

黄嘉乐于去年11月初，拍毕新剧《本尊就位》已功成身退，只系未即时公告回复自由身，“TVB对我好好，咁多年有好多得着，就算知我唔再续约都畀个重要角色我做，即使离开咗仲好有归属感。” 他自爆仲未交还职员证、清空公司locker及交出锁匙：“佢哋都冇催我，可能觉得我会随时返去！”

▲离巢前仍获重用，在新剧《本尊就位》角色好重。

结婚成离巢最强动力

在TVB工作21年，被封“御用细佬”的黄嘉乐去年终于如愿，在新剧《法言人》中拍住马国明、林夏薇和张颕康等成为主角之一，令他如释重负，加上8月跟拍拖5年的江惠贤（Samantha）结婚，成为离巢最强动力，“人生系需要一个转变，趁住外表仲后生咪出去试吓，每个人都锺意安逸， 但再拖落去就唔会有改变，去年喺疫情兼打风下圆婚，仍获好多亲友祝福，深深体会到原来冇嘢系做唔到嘅。”

太太唔惊老公搞搞震

黄嘉乐承认，成家立室后压力重咗，想搵多啲钱，又想跳出舒适圈试多啲新嘢，包括重返电影圈及出外登台。 咁啱约满时间食正中港两地通关好时机，故农历年后率先北上拍古装剧，离开新婚太太3个月，他向Samantha承诺唔会打烂斋砵闹绯闻，“唔使担心喎，都成年人啦，咁耐以嚟我纪录良好，而且唔想成为劣质艺人影响发展。” 镜头外的跟得老婆就忍唔住插嘴：“哈！ 我未惊过，就算个女仔身材有几好，对佢都冇用嘅。” 至于系咪赚到1年TVB人工？ 他即笑住避谈：“唔讲呢啲，最重要系有嘢做。”

▲去年11月中，黄嘉乐出po感谢TVB陪伴他21年成长。

▲疫情加埋打风下圆婚并不容易，一对新人获星级兄弟姐妹力撑。

嘉乐感动表示，无论财力还是精神上，老婆都会全力back up：“我做咗21年未试过转工，喺人生交叉点难免有啲忧虑，最担心系收入问题，所以好白咁问太太：‘离开公司收入冇咁稳定，你惊唔惊呀？’ 佢二话不说就力撑话‘惊乜啫？ 惊就两份！’ 就系咁就落实喇......”黄太是摄影公司老板，嘉乐笑指太太有啲钱可以养活到自己，他自给自足冇咁大压力，“虽然风险有啲高，但愈危愈有机，希望有高风险回报。” 对于突然离巢，嘉乐承认系秘密行动，完全冇跟“铁马家族”商量，“我估佢哋会担心我外闯唔安全，未必会赞成，会系咁问‘点解？’ 我唔想解释咁多，亦唔希望雄心壮志被打沉，趁有胆就去试，试咗唔会后悔。” 在TVB期间，除咗识到一班好兄弟，2006年剃头拍《汇通天下》时堕马也相当难忘，好彩只系轻伤。

▲婚前黄嘉乐不时带埋Samantha和“铁马家族”相聚，但喺关键时刻却未有跟他们分享。

▲2010年，嘉乐跟马国明、林子善、唐诗咏、郑嘉颖等拍剧集《铁马寻桥》，日对夜对变成好友。

▲黄嘉乐于2011年曾拍内地剧《妈祖》，但当时发展受阻。

▲2006年返内地剃头拍首个古装剧《汇通天下》骑马戏，堕马后好彩及时，只是扭亲足踝。