相隔8年，吕方于下月4及5日再踏红馆举行两场个唱，59岁的他与圈外人伍惠宝奉女秘婚近3年，由昔日“蒲精”变身住家男，吕方更为两岁半饼印女 Emma （吕晨）成功戒烟。 老来得女，慈父上身的他一提“吕神”系咁笑，开口埋口被融化，又话“原来有小朋友咁快乐”！ 问到会否请老友梁朝伟做嘉宾，吕方答得搞笑，“佢都唔钟意唱就冇谓啦。”。 

▲明年登六的吕方呈现幸福肥。

3年前因为疫情，吕方未能重返红馆开Show要改期至下月，无心插柳撞正入行40周年。 届时必唱《弯弯的月亮》及《听不到的说话》等经典歌。 他表示，如果老友杜德伟在港一定助阵做表演嘉宾，至于正为新戏《风再起时》宣传的梁朝伟，吕方就有所保留：“以往从来冇叫过佢，但其实可以请佢嚟睇骚，但打人情牌力邀佢上台就冇谓喇，当年我拍音乐辑都请过佢唱歌，不过，佢都唔钟意唱就冇谓啦。” 问到会否安排乖女上台？ 吕方即紧张大师上身话未决定：“老婆赞佢有音乐天份又锺意唱歌，建议佢上台玩吓，我唔太赞成，佢得两岁几仲系细，如果见到咁多人吓到大喊都唔知点处理。” 他又自爆每次播佢嘅歌囡囡都零反应，说时一脸落寞。

▲相隔8年多吕方重返红馆开Show，张学友、梁朝伟、钟镇涛都系吕方密友。

锡囡囡多过锡老婆

转眼入行40年，吕方形容时间过得好快，感慨说：“有高低起跌先系人生，畀我重新玩一次你话几好呢？ 不过，去到呢个阶段系人生另一个高峰，我好享受家庭及囡囡，佢哋畀到我喜悦系形容唔到嘅，原来个女咁可爱同聪明，𠵱家仲醒目过我，真系被佢融化... 系晕呀！ 唔生女真系唔知...”他愈爆愈多，坦言暂时锡个女多过老婆，语毕又戴返个“头盔”解画：“讲真锡佢哋系一世嘅，个女肯黐我呢个过程得几年。” 他又开心share凑女日常：“每个阶段对个女有唔同锡法，初出世会帮囡囡换片、扫风、喂奶、就算睇住佢去厕所都系乐趣，当我发现每次陪佢去完厕所，佢会好温馨咁望住我，体会到原来除咗‘姐姐’以外爸爸都会做呢啲事，会对我特别好，咁我就特别enjoy去做。 佢又似足我好为食，岁几经已食大人嘢，如芫茜及榴莲，平时唔使喂佢食。”

作息正常想玩耐啲

以前吕方爱自由自在，年轻时和杜德伟、罗文等疯狂去Disco饮酒、跳舞，经常玩天光唔愿瞓：“𠵱家陪个女早睡早起，晚间约会只会搬返屋企。” 他仲自爆为宝贝女成功戒烟：“食咗几十年烟以前戒极都唔得，直至囡囡几个月大闻到烟味拧开块面，我就话戒就戒，见到个女乜烟瘾都冇，连老婆都唔敢相信，呢个都系做咗爸爸嘅责任问题，我都希望身体健康可以玩耐啲，唯有做好自己，生活要正常啲。” 他自言有个女经已活在快乐中，用强调语气话：“出面讲乜都听唔到，唔会影响到我，我唔会睇新闻。”

▲年轻时吕方崇尚自由，经常跟梅姐（梅艳芳）夜蒲Disco。