黄宗泽（Bosco）、胡定欣和王浩信继2013年《猫屎妈妈》后，相隔10年再于《廉政狙击》合作，剧中三人是儿时好友，叫三人讲吓旧史包括初恋，估佢哋唔到表现雀跃，更首度亲画初恋对象，爆笑之余仲好鬼嘈。

▲3人访问期间，快乐互寸，笑声不绝。

▲浩信、定欣和Bosco在TVB多年来合作无间，早已建立类似“五茶煲”的友情。

Bosco在现实中都有类似《廉》中的“五茶煲”友情，“初中时一起长大嘅五个同学，到𠵱家都好好兄弟，我哋个group都系写五兄弟，所以会有啲共鸣。”而浩信和定欣就认为“五茶煲”跟他们在TVB一起大的感情很相似，演绎时好易投入。浩信说：“我哋五个人嘅关系都差唔多10几20年，足够投入角色。”定欣跟好姊妹黄智雯真实相处的感觉亦放到演绎上，“我同智雯成为好朋友后本次第一次合作，好珍惜呢个机会，有场讲同我相认揽住我，好有感觉，最难系隐藏我嘅情绪，佢出现感情问题我畀意见，虽然现实佢唔需要我咁做，但嗰种对谈就好似现实中智雯同定欣，好情深倾偈嘅感觉。”

▲剧中“五茶煲”的友情，他们攞现实中的感觉已帮到投入。

▲Bosco和浩信在剧中有不少兄弟间的对手戏。

▲定欣和智雯私底下感情极好，要演好姊妹无难度。

▲剧中定欣和Bosco演姐弟，实则Bosco年纪较大，两人做情侣都几衬。

王浩信心仪同学似晴子

讲完角色就返回现实讲吓旧时，初恋是必答题目，要三人用画画方式公开人生首位心仪对象，三人未落笔先兴奋，边画边讲更互相不停插嘴，嘈到呢。

（王：王浩信、黄：黄宗泽、胡：胡定欣、记：记者）

先由读美术的王浩信打头阵，画得有水平兼劲有动漫感觉，Bosco和定欣都睇到哗哗声。

王：我系喜欢画漫画，呢个系我第一个画嘅image，有少少参考我喜欢嘅日本……。

黄：（抢答）饭岛爱（已故日本知名AV女优），哈哈！

王：哈哈！参考好喜欢嘅日本漫画《男儿当入樽》裹面嘅赤木晴子个画风，都有少少似我初恋情人。嗰时我14、15岁，初恋对象都系眼大大，鼻高高，头发短短，因为学校唔畀留咁长，佢系同学嚟，但我哋冇一起到，来龙去脉唔讲咁多，我嗰时好怕丑，由F1喜欢佢到F2，F2终于同班，佢仲坐我隔离，但我全个学期紧张到一句说话都冇同佢讲过。

记：你冇同人哋讲过嘢，以为你憎佢𠻹！

黄：系啦！

王：怕丑嘛！

▲浩信所画的初恋对象真系几靓，达专业水平。

▲好难想象中学时的浩信，竟然是个怕丑仔。

▲浩信自爆细个劲怕丑，对住暗恋对象一年都唔出声。

胡定欣细个暗恋“张兆辉”

轮到胡定欣，当事人自称只识画火柴人所以放弃唔画，选择用名交代。

胡：张兆辉，辉哥！

黄：唔系要画嘅咩，我都敢出街啦！

胡：辉哥咁靓仔，我惊画得唔好呀！我读紧小学，好记得去一个老师屋企补习，曾经出现过一位哥哥，我系心心眼，补紧习偷望佢，个感觉好似辉哥，仲谂将来老公要拣呢类型，好有安全感好稳重。

记：嗰时系咪睇得多辉哥啲戏？

胡，唔系，系嗰刻觉得呢种男人好吸引到我，但我真系读小学㗎咋，好单纯嘅感觉。

问到有否同张兆辉讲过？定欣表示有，而辉嫂当时亦在场，但她已忘记辉哥当时反应，Bosco即笑言，“辉哥喺度震紧，我老婆喺隔离讲啲咁嘅嘢，哈哈！”定欣即补充，“今时今日我认识辉哥，知道佢嘅好，证明我喜欢系冇错，佢系好好嘅老公。辉哥每次行出嚟，我都觉得真系好靓仔呀！”

▲ 定欣讲明不是懒，只是不想画丑心目中的男神张兆辉。

▲ 原来张兆辉一直是定欣拣老公的标准。

▲ 小学时期的定欣，人仔细细已识得玩暗恋。

▲ 定欣中学时读女校，所以异性朋友不算多。

Bosco有兄弟帮手追女仔

Bosco压轴出场，讲明唔识画画，但仍然好勇敢公开大作，仲边画边唱出卖年龄的歌“圆圈加一点，圆圈加一点。”以为Bosco品味奇特，暗恋对象似多啦A梦，“系我第一个喜欢嘅卡通，边个生到叮当咁样，哈哈！”搞完事先肯正经答。

黄：初恋咪同班同学，F4、F5，咦！有冇记错。

胡：定系小4小5，哈哈！

王：K1，哈哈！

黄：应该系F6、F7，佢系第2间学校转过嚟，短头发，唔系大大的眼，我同佢（王浩信）有分别。

王：佢喜欢单眼皮。

记：点样追到佢？

黄：都系一大班朋友约出去玩。坐吓埋啲，坐吓埋啲咁啰！

胡：叫你啲兄弟欺负佢，你再英雄救美，哈哈！

王：点知啲兄弟真系欺负佢，哈哈！

黄：男仔都系咁，你喜欢边个其他会帮忙攞电话，帮兄弟做啲嘢。

记：毕咗业就完？

黄：我入咗行先至完，呢啲就唔好提啦，又唔系伤心嘅，不过过咗去。

▲Bosco落笔时已笑不停，公开大作后大家都起哄。

▲Bosco中学时已高大靓仔，初恋是高中女同学。

▲Bosco被王浩信爆，喜欢女仔单眼皮。

采访：杜杜 摄影：Stanley (黄宗泽)形象:Queenie Yu 服装:Wardrobe: Homme Plisse by Issey Miyake 发型:Kel Fung@HH salon.nail化妆:Davina from Cyrus Lee’s team(胡定欣)形象:Queenie Yu服装: Isabel Marant发型:Matt Chiu XENTER SALON 化妆:Stephen Lau(王浩信)服装:Harvey Nichols发型: Sue Cheung 化妆: Herny Li

以上内容归星岛新闻集团所有，未经许可不得擅自转载引用。