一代巨星张国荣(哥哥)离世20周年，昨日有行内人向本报公开尘封20年的哥哥绝密娱圈趣事，今日就有贴身追随哥哥34年的忠粉Ann Ting，细诉跟偶像的相处点滴，以及从哥哥口中得知，只有至亲才知的私密事，并非农场式翻炒旧闻绝对珍贵，包括曾有痴情狂迷，用尽方法想得到哥哥注意，发喜帖公布同张国荣“婚讯”;另外，哥哥昔日位于加多利山布力架街的故居，原来曾试过被失常狂迷从后门爬树成功潜入屋，更坐在床边等哥哥，好恐怖呀！采访：方骞平

▲跟忠粉阿Ann合照的哥哥，着短裤仔露出白滑到反光的靓腿。

▲Ann同哥哥无所不谈。

《头条日报》的资深娱记提供两张34年前亲手影的私藏靓相，畀哥迷重温哥哥昔日风采。相片摄于1989年2月，当日记者相约哥哥到浅水湾影贺年相，已是天皇巨星的哥哥打扮到靓靓仔仔现身，仲有求必应，拎完大炮仗又吹风车，拍摄期间更温柔地命令记者:“拎个袋畀我。”据记者形容该装满贺年道具的胶袋都相当唔美观，但哥哥都拎咗一阵先转手畀身后的男助手拎住，劲有风度，呢啲就真系无明星架子嘞！哥哥对传媒体贴又有礼，亦是其成功之道，𠵱家啲艺人真系要学吓嘢喇。(编按:极葡萄)

▲亲拍私藏靓相之一，手执一串大炮仗嘅哥哥，甜笑望镜头，完全冇大明星架子。

▲亲拍私藏靓相之二，天王巨星有求必应，叫哥哥吹风车完全无托手踭，你睇佢几可爱。

哥哥唐唐分房瞓

其实哥哥唔止对后辈及记者好，亦好爱锡Fans。贴身追随哥哥34年的忠粉Ann Ting更成为哥哥的倾诉对象，阿Ann经常于片场及哥哥惯常光顾的Coffee shop出现，大家会闲话家常，由电影讲到生活锁事：“印象最深刻当年哥哥同我讲过，对正佢二楼睡房出面有棵大树，竟然有女歌迷爬树，再神不知鬼不觉咁由窗口潜入佢间房，完全无惊动楼下嘅家佣、司机及唐唐(至爱唐鹤德)。直至当晚佢返房，一开灯就见到有个女人坐喺佢床边望住佢，两人对望时哥哥吓到心都离埋，只能装作镇定，一方面安抚住对方，然后设法逃离现场。”

▲忠粉Ann经常到片场探哥哥班。

▲哥哥二楼睡房出面有棵大树，狂迷曾爬树从窗口入屋，事后已加窗花。

▲哥哥同唐唐风雨不改，相爱多年。

阿Ann形容哥哥向她自爆“狂迷入屋”事件时，虽然犹有余悸，但都讲到眉飞色舞，描述时还添上几分刺激感，凸显佢可以好机警咁面对危机处理，招积得嚟都几好笑：“哥哥话，佢吓一吓之后，就𠱁住对方，答应同佢结婚，仲追问对方‘你叫乜名？’、‘我送你落去乘车呀！’边讲边退到房门口，哥哥即九秒九跑出房再闩埋门，然后大叫家佣及司机挟对方离开，但哥哥真系大好人，佢冇报警。经此一役，马上赶工加装窗花，唔使长期提心吊胆。”另外，据知哥哥跟唐唐同居时是分房瞓，佣人亦要经哥哥批准才能入房打扫。

▲哥哥位于加多利山布力架街嘅故居睡房，曾被狂迷成功潜入。

▲哥哥于1999年推出《ALL ABOUT LESLIE》写真集，由日本摄影大师清水安雄拍摄，部份靓相在哥哥的寓所取景。

▲哥哥有顽皮一面。

▲哥哥露点呀。

PatPat靓过梁家辉

另外，Ann还透露，哥哥有幽闭恐惧症好惊搭电梯，所以唔like住apartment外，都几怕跟陌生Fans距离太近：“约翰连侬（John Lennon）被疯狂粉丝枪杀(1980年12月)，佢都惊俾Fans伤害，划花佢块面…所以喺公开场合，会默契地畀铁粉靠到最近，帮手做埋保镖。”哥哥要求Fans斯文有深度，会同佢有互动讲吓电影，而唔系做“花痴”：“所以我见佢前，即使未睇过套戏都刨定影评，最记得佢同我交流梁家辉主演嘅电影《情人》，佢问我‘你觉得家辉个pat pat靓唔靓？’正当唔知点应佢时？哥哥自问自答话‘咁我个pat靓啲…’好搞笑。”另外，搞鬼的哥哥亦曾在Ann面前整蛊唐唐，“佢讹称自己派晒手头嘅利是，叫我哋搵唐生𢭃利是，吓到怕丑嘅唐唐不知所措，佢用尴尬而不失礼貌嘅微笑答‘利是？有有有…’语毕就系咁摷，在旁嘅哥哥目击唐唐嘅反应，笑到卡卡声，好Sweet。”

▲哥哥避忌陌生fans埋身。

▲梁家辉在电影《情人》中有大胆全裸演出。

▲哥哥同梁朝伟性感演出。

▲张国荣多年来靓相重温，昔日风采令人怀念。

相关新闻：

张国荣逝世20周年|哥哥也曾青涩迷人，近20部剧集造型一览

张国荣逝世20周年|香港7大纪念哥哥活动、展览一文看清！

以上内容归星岛新闻集团所有，未经许可不得擅自转载引用。