突发记者最紧要第一时间到现场影相，早年我哋听机收料，所以有机会快过警察到。

记得91年贼王卢世安畀人劫狱，有疑犯拎住AK47匿埋喺锦田，我听机觉得有料到，揸车去锦田见到飞虎队车，但差佬又封晒路，好彩有朋友踩单车载我入村！但因为发生过枪战，警察都大嗌：“有手榴弹，唔好留喺度呀！”我就即刻去对面屋2楼影落去，见到尸体、手榴弹，仲影到独家相！

仲有93年兰桂坊人踩人惨剧，我差唔多第一个到现场，劲多伤者瞓晒喺度呼天抢地！当时影到冇晒菲林，后来先知死咗廿几人……

记者同普通人唔同，除咗有相有片，记者仲要去查证、去现场睇、去追尾，只要肯跟，每单新闻背后都有故事！最初入行冇咩使命感，后来越做越有衝劲，做到独家故、影到靓相时仲少少虚荣添！虽然做记者饿唔死，又唔会发达，但我都几钟意呢份工，做到退休就更满足！

听机: 收听999机追新闻

追尾：追访当事人及跟进事件

以上内容归星岛新闻集团所有，未经许可不得擅自转载引用。