2016年港姐冠军冯盈盈的言行一向出位，更曾被封为“性博士”，不过提到在首演女一的剧集《妳不是她》中跟丁子朗有大量亲热戏，今年踏入30岁的盈盈竟然觉得超尴尬，更首度澄清以往出口成“性”，只是节目效果需要，私底下绝对相反。单身3年的她更落闸圈中人追求，情倾识谂的圈外人。

▲踏入新一年，盈盈希望尝试做打女或奸角，更想学以致用主持有关营养学节目。

自2021年拍毕《智能爱人》后，盈盈相隔3年才有新剧推出，更首做女一，她承认压力超大，幸好是爱情剧，加上监制陈萍安排她跟饰演同居男友的丁子朗“拍拖一日”作实习，“预备咗气球、鲜花、礼物、蛋糕，再行街、睇戏、食饭、行沙滩、坐摩天轮，好似拍一日拖咁，同丁丁建立默契，感觉熟啲，埋位唔会好陌生。”剧中她跟丁子朗有大量亲热戏，盈盈表示超尴尬，“始终都系女仔嘛！拍嘅时候亦都唔系大家睇见咁浪漫，有10几20个工作人员围住，要克服心理障碍，旁若无人豁出去。”她要感谢女监制会亲身试位，“我会更加放松，同丁丁做嘅时候更加顺利。”

本色演出“夏莉”

估不到一向言行大胆的盈盈，拍亲热戏会好惊青，她首度解释真实的她绝不口沫遮拦，“一路以嚟言论可能比较大胆，都系符合返节目要求，好似之前主持啲清谈节目《后生仔倾吓偈》，或者上游戏节目要搞笑。”盈盈表示真实的她，跟剧中车祸前的“夏莉”最似，“唔系几出声，比较保守、沉稳。”连胞弟亦指她本色演出，“播出第一集见到斯文嘅我，细佬就话『呢个完全系平时屋企嘅你，唔多出声好cool，沉默寡言，冇乜表情，本色演出喎』。”盈盈再强调，“嗰个先系真正嘅我。”她解释受出道作品所累被外界误解，“一出道就拍《果栏中的江湖大嫂》，做一个比较爆嘅角色‘小狼女’，一嚟主持《千奇百趣特工队》游戏综艺节目，我系新人啱啱接触呢啲工作，谂紧点样投入角色，系咪要迫自己佻皮啲，energy高啲hyper啲，好似要炒热个气氛，可能因为咁样定型咗形象。”

进修性情大变

除了幕前演出，盈盈的社交平台或受访时，亦表现得好非一般，她承认入行初期受氛围影响，力指非真实的她，“都知大家期望系咁，我都会受到感染比较hyper，现在慢慢展现返真实一面都系好事。”她就否认因被劝告才收歛，完全是想法有变，“都大个女，下年（2024年）都30岁，虽然我唔觉得系一个好大嘅关口，之前返咗去读书（营养学硕士），令我喺思想、性格上有啲变化，好似沉稳咗啲，更加系我最真实嗰面。”访问当日盈盈坐得斯文淡定，的确跟以往判若两人。

搵圈外人拍拖

剧中盈盈跟丁子朗好Sweet，现实已单身3年，唔急拍拖的她对另一半的要求较以前更清晰，“一定要思想成熟，情绪稳定，EQ高情商高，识得包容我，体谅我，尊重我，特别系我做紧嘅工作，始终做艺人有好多唔容易嘅地方，开工时间日夜颠倒，如果另一半唔识从我角度出发，体谅我嘅话，好难相处。”她认为跟圈外人拍拖会更适合，“我都有谂过圈内人唔系会更加明白工作难处？！但系圈内人开工时间都好唔稳定，两个都难夹嘅话，点会抽到时间相处？！始终一段关系都要抽时间培养同经营，搵一个成熟嘅圈外人体谅自己，系理想嘅条件。”

以上内容归星岛新闻集团所有，未经许可不得擅自转载引用。