53岁周国丰成为《中年好声音》评判“周老师”后人气急升，吸引唔少fans翻煲他的旧历史，就连在网上节目“爆响口”：“梁荣忠好似结咗婚”都成为焦点。从事广播事业31年的周国丰大爆电台秘闻，除首度揭露被梅艳芳拍枱闹爆内幕；又大爆“金句王”黎明跟已故DJ蔡龄龄吵大镬真相，单单都好Juicy。

《中年好声音2》进入14强白热化阶段，评判之一的周国丰有份把关，他以多年来听歌经验及对音乐嘅认识，向参赛者剖析有冇错误理解歌词内容及唱错感觉。当问到心水选择时？周国丰坦言偏爱素人：“因为素人有无限发挥空间，可以睇到佢哋进步；相反做过歌手嘅会有包袱，唔容易突破自己。”他寄语参赛者应该珍惜台上伤心及感动位，就算爆喊对演绎抒情歌都会有帮助。

梅姐两次主动道歉

周国丰由19岁开始担任港台DJ至助理广播处长位置，最难忘是被梅艳芳拍枱狂闹：“梅姐系1998年《十大中文金曲》‘金针奖’得主，我负责歌星统筹，由于‘老细’多次要求更改表演项目，仲要改到飞起，去Band房探班，再向梅姐提出要改啲乜...事隔26年仍然好记得当时嘅梅姐好㷫，恶到癫，嬲到震，仲拍晒枱指住我狂闹‘转来转去，唔要个奖喇’，第一次见佢咁嬲及咁恶，真心好惊，好彩有伦永亮打圆场，佢向我打眼色示意我先离场，最后各让一步成事。不过，彩排期间我都尽量避开，唔敢再去惹佢，直至完场后梅姐主动跟我道歉，叫我唔好嬲佢。”其实梅姐曾先后两次跟周国丰道歉，包括做直播节目甩底，至节目完结后3小时才致电认错：“佢直认系唔知醒，欣赏佢嘅坦率性格，我好尊重佢。”

哥哥面前狂呕失仪

提到“金针奖”，周国丰再想起一单事：“翌年张国荣(哥哥)攞完‘金针奖’，去完港台庆功宴后再有私人庆功宴。哥哥喺庆功宴上好热情咁斟靓红酒招呼我，因为之前我喺港台庆功宴饮得太多啤酒，沟酒后不胜酒力，出晒事，“我坐喺哥哥身边饮酒，突然涌上一道气，好似开水喉咁狂呕，好彩及时拧转身冇呕向哥哥，但真系样衰到爆，朦胧中仲听到王菲大笑声，哥哥不单冇藐爆我，更叮嘱朋友帮我抹干净，第二朝仲来电追问‘你冇嘢呀？’自此留有阴影，唔敢再沟酒饮喇。” 

黎明原来曾经有火

当年黎明(Leon)系周国丰节目常客，每次两人见面都“互窒”好似嗌交，“其实我哋只系斗嘴，大家关系好好，唔伤和气，从来冇嗌过交，反而有次Leon接受港台一台《开心新航线》访问，面对蔡龄龄大堆发问时，Leon竟火爆质问‘有冇做准备？’，两个你一句我一句‘嚟料’(吵架)。”黎明被封“金句王”，周国丰眼中的Leon，对答亦非常出色：“印象最深一次，节目中我跟客席主持陈淑兰追问Leon，有名有利仍想追求甚么？佢虚无缥缈回答‘想要月球上一根草！’吓到采访嘅传媒鸦雀无声，最后兰子顶唔顺话：‘虽然爱你，但唔知你讲乜。’，翌日呢个访问变成娱乐版头条新闻。” 

另外，之前姜涛在《共创明Teen》活动上唱《蒙着嘴说爱你》甩嘴，遭网民狠批“咪嘴”。作为活动制作顾问的周国丰为姜涛平反：“件事对佢唔公平，因为佢嗰朝8点几经已现身彩排，如果要咪嘴唱歌，就唔使咁早嚟彩排啦，其实要赞佢系好认真对待件事。”

以上内容归星岛新闻集团所有，未经许可不得擅自转载引用。