保安局局长邓炳强又同一班后生仔倾偈（聊天），话说邓炳强收到秘书通知，一班暑假嚟保安局实习嘅青年约佢开会，点知原来係突击访问，当中问题更加係多到答唔晒，例如问局长嘅MBTI、最辛苦嘅时刻、钟意做处长定局长等等。

▲一班暑假到保安局实习的同学突击访问邓炳强。影片截图

邓炳强今日（11日）喺社交平台上载影片，内容係佢同一班保安局实习生嘅访问对答，开场第一问同学仔想知道局长嘅MBTI，邓炳强就话好多人觉得佢係“E人”（外向型），但佢就认为自己係“I人”（内向型），因为佢好钟意自己一个人喺屋企入面睇吓书、做吓运动。

出任保安局长之前，邓炳强係警务处处长，同学仔就问佢钟意做处长定局长多啲，邓炳强回答话“我钟意做一个做过处长嘅局长”，答案令到同学仔好无奈；同学仔之后再问局长一个好难答嘅二选一问题──钟意“警队蓝”还是“中国红”，邓炳强嘅回答仍然得体，佢话香港係一个五光十色嘅地方，除咗“警队蓝”“中国红”，佢总钟意“国安紫”添。

谈及上任两年最辛苦嘅时刻，邓炳强就话係23条啱啱开始做咨询嗰阵，有一日声沙、眼睛发炎、肩周炎、痛风一齐嚟，认为嗰一日係最辛苦。不过，23条立法係佢最有成功感嘅项目。

以上内容归星岛新闻集团所有，未经许可不得擅自转载引用。