77岁汪明荃（阿姐）德高望重，深受后辈爱戴，陈慧琳、容祖儿、杨千嬅、林家谦和卢瀚霆（Anson Lo）扑住去做她个唱表演嘉宾。 红足超过半世纪的阿姐分享作为成功艺人之道，除要具备个人风格及紧贴潮流不断求变外，最重要私生活一定要检点，尤其强调：“任性只会自食其果。”另外，打算做埋这几年的阿姐首爆将来的退休方案，原来打算转做网红：“重温旧事，就算讲只狗都有排讲啦。” 

▲阿姐德高望重。

等了7年，汪明荃于本月23及24日举行红馆个唱，阿姐相当期待：“fans成日睇我做大戏唔够嘛，佢哋未必系大戏迷。”阿姐更特地搵来林家谦及黄伟文等星级团队打造演唱会主题曲《Make my day》答谢fans多年来支持，顺道喊住钟柔美、谢安琪、Anson Lo、林奕匡共舞造势。

▲阿姐状态大勇现身个唱记者会。

年青一代赞MIRROR几好

阿姐能融入年青人世界：“我哋梗系想有多啲年轻人啦，我同班后生都夹㗎，佢哋都受我玩。”虽然阿姐认唔到太多后生面孔，但就赞MIRROR几好：“其实要是男团入面突围而出好难，要靠自己，一定要有个人风格，如果个个都系韩仔咁嘅样及衣着，就冇办法认得到㗎啦。”当问到阿姐，靓仔是否会望多两眼时？ 她爆笑回应说：“（做艺人）一定要靓啦，唔靓就睇《中年好声音》... ”

科技主导自己人生

对于陈志云网台节目中提及的“阻人上位”论，阿姐强调自己不会阻住地球转：“就算系做大骚司仪，我只系做头及尾，畀晒机会佢哋㗎，咁样我仲会叹啲！ 每个人有自己嘅角色，我嘅位置系辅助佢哋，每个阶段要做啲适当嘅嘢，就算年纪大咗做阿妈依然有得发挥。”提到退休问题，阿姐形容应该都是做埋这几年：“希望5年后都做得到演唱会啦，但当感觉到体力都唔得，连台词都记唔到点做落去？ 连自己都接受唔到就冇谓勉强。”阿姐又首爆退休生活方案：“到时自然有嘢做啦，钟意做就做，除咗可以做导师教人，甚至开个网台重温旧事，是但讲个奖都可以，咁多奖足够讲一年，就算讲只狗都有排讲啦，好多网民锺意睇我啲开箱片，即使生活日常，喺花园晒衫、晒袋、盂兰节烧衣都成热话。”被记者大赞好有谂头的阿姐秒答：“我谂头梗系唔差啦。”阿姐仲自爆系YouTube迷，会睇些关于政治的网台节目，亦感恩科技发达：“可以喺社交网做宣传，自己主导自己人生，咁样好好呀。”

投诉老公危险驾驶

演戏超过半世纪的阿姐认为所做的事都有成绩，所以没遗憾事，反而觉得演艺人生好幸福，阿姐又分享作为成功艺人之道，除咗不能停留不断求变外，也要保持个性及keep住好形象，谨记要做个正常人：“因为我哋嘅米饭班主系观众，佢哋识得分辨艺人戏里戏外嘅‘角色’，尤其大家都接受唔到嘅私生活，咁就会自食其果，所以做艺人要检点啲，做人做戏做得都要好， 只管任性做啲自己喜欢嘅事就要负返责任；反而肯帮人、爱护长者、回馈社会自然会加分。”另外，保持心境开朗、生活简单是阿姐77岁的保养心得，她强调怕痛不做微调：“我唔介意畀人话有皱纹，觉得自然老去会好啲。”阿姐生活开心，身为老公的罗家英当然有功劳，他带给阿姐不少生活情趣：“我哋都好锡对方，咁两公婆对几十年，日日夜夜嘈交唔得㗎嘛。”阿姐唯一投诉是家英哥时常“危险驾驶”：“佢好多时开车行到两线中间，咁危险点会唔出声？ 我都好惊呀！ 但佢会唔钟意，咁我咪收声啰。”

以上内容归星岛新闻集团所有，未经许可不得擅自转载引用。